桐庐县

大家好，今朝我来介绍一记阿勒桐庐江北老城区个东门头。 东门头个位置呢，徕分水江同富春江交界个地方。 箇里有码头，来往比较方便。古时候是蛮热闹发达个。 古代个辰光桐庐东南西北都有城门， 南门是迎熏门，东门是启明门，另外两个门叫底了名字，箇卯已经勿晓得了。 东门实际上是个飞（应该是fi，读错了）檐画壁个古典城楼。徕长达千年个辰光里向， 恢弘个启明门一直是桐庐个地标性建筑。 抗日战争爆发个第两年， 1938年，启明门畀日本飞机投落来个炸弹炸掉了。 千年名楼毁于一旦。据史料记载， 启明门是下方型墙体，分通四方， 分别朝向富春江东门渡、大街、东门横街 同桐君山，高顶造有双层飞檐楼阁。 古代桐庐县城个大部分重要建筑基本浪都徕东门头附近。 徕旧东门渡码头边浪，曾经有一个四柱三间五楼的大石坊。 箇就是1523年，为桐庐明朝个右度御史俞谏造个“内台总宪坊”。 可惜箇座流传数百年个古坊 徕1964年开元街改造中畀拆掉了， 另外徕当时个狮子埠还有一个叫“大宗伯坊”个古建筑。 就徕“内台总宪坊”个南面。是明成化（1465-1487）年间， 为明朝礼部尚书姚夔造个。 老早个东门头， 老字号店面阿有莫佬佬。有绍兴人宋家鼐开个惠宾宾馆， 是当时整个浙西地区顶有名个宾馆。另外阿有包恒兴南货店， 福兴和官酱园，襟江春菜馆。 有名个小吃么有沈小苟鸡子饼，宋有根馄饨， 毛吉松干菜饼。 当时个东门头沿着江边开了一排一排个茶店， 都是前门对牢街里，后门朝富春江个， 顶有名个一爿是一个北方人开个叫张裕隆茶园。 徕茶店里向吃吃茶，听听用吴语讲个大书，阿是莫佬遐意个。 民国个辰光，钱塘江浪顶有名个 桐庐货船叫“西江大船”，就是从箇里畀货运到苏州，杭州， 上海去个。 富春江浪个茭白船阿是一个特色。 茭白船就是用柏树造个龙娘船，伊个样子同茭白一样， 有三十多吨重，油漆光亮，高顶有乌篷。船上都有歌伎， 弹弹琵琶，唱唱歌。到了民国初期，狮子码头阿有四艘箇样个茭白船。 后来因为公路个开通，水路就开始变得勿重要了。 再加上桐庐城区个扩展，东门头就衰落落来了。