大田社区

我奶奶跟我爹爹夥是1940年生个 我奶奶跟我讲，其四岁个时候，看到过日本鬼子跑到我俚冲里 那前过日本鬼子快打输哩，莫得地方去的哩，到处跑 我老婆婆就带到我奶奶跟到大齐家夥往山高头跑，唔那个话就被日本鬼子抓过去哩 我爹爹屋里五弟兄家，我爹爹是老二，屋里五隻弟兄除过我爹爹，脱哩几个夥在门面当过兵。我爹爹年轻个时候喫公共食堂 把隻酱油打到地上，其本来就是莫执要个，就是大队书记欺负其，扣过其几餐饭 箇时，我爹爹就死冲跑过哩，路也唔做哩。那前过正好有隻远当亲戚在内蒙古包头，其就跑到包头 跟到别个学过一年个厨师。后面我老奶奶写信把其，其才之回来跟我奶奶结婚 我奶奶后面讲：“得把好尔爹爹学到隻厨师，后面还进过水泥厂食堂上班 现在还担得退休工资到，唔那个话只有农村里种田哩。 我爷跟我娘夥是1964年生个 其两个从细前过就认得。我爷读高中个时候，冲里还冇得电，夜前过看书就弄到棉花跟纸 行过一里多路哩，才只晓得莫带钢笔，又打转回去担。我奶奶那前过只想要其莫读书哩 屋里还有隻人做路。就笑其，讲：“尔要去考试，连隻笔得莫担，还考试扒卵啊”。哪晓得，过过两个月 我爷接到河海大学个录取通知书。箇时我爹爹才发话，跟我奶奶讲：“其要读书，唔听其去读啊 我哩只管寻钱就是来。”我爷去读大学个时候，莫哪个去送其，其就一个人挑两隻垅箱，去南京去哩 我娘那年莫考起大学，去一中复习，我客公要其莫读哩，招工去上班算哩，其唔肯，心里想我爷都考起大学哩，其也唔得落后 我娘后来复过三年，尽到考还是莫考起，越考越冇味。1987年正好可以招工 我娘想横直也考唔起，干脆莫考哩，参加招工，就到副食品公司上班哩 后来我爷大学毕业哩，分到长沙当教书先生，在湖南水利水电学院教大学。1989年，我半岁哩 我娘在屋里带我，我爷还在长沙教书，想把我娘斢到长沙去，冇斢成 正好我那年还只点点大之，我娘一个人在屋里带我，还要上班，太吃亏哩 箇时，我爷一下狠心，就把箇隻大学老师个工作夥辞过哩，从长沙回到屋里来，后面在县里个职业中专教过十多年建筑 我奶奶跟我爹爹是1940年生个，属龙，我娘跟我爷是1964年生个，属龙 我1988年生个，也属龙，所以讲，我哩屋里五个人，就是五条龙